GALLIA ROMANA

« Or ce que i’ay peu apprendre de la plus longue & chenüe antiquité des bains de Plumbieres, Est que l’aisné de Clodion le chevelu, nommé Ambron, ou selon d’autres, Aubron, pendant le seiour ordinaire, qu’il faisoit en la forest des ardennes (où il feit ediffier plusieurs temples à l’honneur de ses Dieux payens & imaginaires. & aucuns chasteaux comme Namur, [25v°] […] fit rebastir la cité de Strasbourg […], & entre autres choses dignes de memoire & d’honneur feit r’ediver (sic) les BAINS DE PLOMBIERES. Voila lecteur amiable, le plus ancien tiltre & mémoire que j’ay peu rencontrer en lisant (curieusement toutesfois) les antiquitez sus quoy je supplie un chacun repenser un peu sus ce mot de REEDIFFIER pour en tirer une consequence tres aseuree, que puis que par long laps de temps lesdits bains estoient demolis que la mémoire en est fort ancienne, car ceste reediffication faicte par ledit prince Ambron est de l’an de grace 484. au raport & calcul de [26] Balduinus, Richard de Wassebourg en ses antiquitez de la Gaule Belgique, & autres plusieurs. […] Que lesditz bains de plumbieres aient esté autresfois en quelque grande recommendation appert par la grande despence qu’hom’ y a employé en les batissant premierement, & depuis rebatissant, Car l’ouvrage si industrieusement faict par belles & grandes pierres bien polies, proportionnées & cimentées a l’antique, [26v°] tant proprement que le bassin ores crevassé qu’il soit en beaucoup d’endroitz, si tient-il l’eaue toute chaude, subtile & penetrante qu’elle est tellement qu’il ne s’en deperit aucunement qu’hom puisse apercevoir, tant & tant est bien élaboré, le ciment qui fait la liaison par dedans & au dessous dudit bassin si bien liz & capable qu’il peut tenir à l’aize environ 500. personnes, & croy que cest œuvre d’ingenieux Romains qui avoient pour lors une façon de bastir & cimenter fort brave & subtile & de dureé (sic) quasi perpetuelle comme se voit encores en leurs hippodromes, arenes, Colisee, place d’ancone, saincte Marie rotunde, Thermes de Diocletian, & autres ruines tant à Rome qu’ailleurs. »