GALLIA ROMANA

« ces changemens faits, & ces nouveaux ordres establis, Martius pour faire admirer à des Peuples subjuguez la splendeur de la Republique de Rome, & leur en faire par ce moyen respecter davantage la puissance, fit faire des bastimens magnifiques dans Narbonne, & d’une Ville peu considerable auparavant, il en fit la capitale de tout le Pays que les Romains avoient alors dans les Gaules : cette Ville receut toutes les faveurs en suite de ce Proconsul, & ce qui s’appelloit desja Septimanie fut appellé Gaule Narbonnoise. Les Gouverneurs qui vinrent apres celuy-là, aymerent aussi le sejour de Narbonne ; ces restes de Capitole qui estoit la forteresse des Romains ; ces ruines d’Emphiteatre ; ces vieilles inscriptions ; & ce petit Senat dont les Senateurs s’appelloient Decurions, marquent assez que Narbonne fut durant leur regne une petite Rome plutost qu’une Ville de Province. […] [60] Malgré les ruines des Goths & la rage de Charles Martel, il y a encore d’ouvrages Romains presque entiers dans la Gaule Narbonnoise… On vois aussi des restes d’Amphiteatres, de Capitoles, & de Temples : mais particulierement on remarque tout cela dans Narbonne, où les Gouverneurs de Province se tenoient d’ordinaire, & ces Gouverneurs faisoient travailler les Soldats durant l’Hyver à ces Ouvrages publics ».