GALLIA ROMANA

DLF XVI^e siècle, p. 262 ; Provost/Chevrot/Troadec 1992, pp. 92-93 ; Lemerle 2005, pp. 107-108

« Il y avoit anciennement pres de la ville un fort bel & excellent Amphiteatre, que le vulgaire appelle les Areines [...]. Duquel amphiteatre les vestigies (sic) & fondemens sont encores apparens en un lieu estant à present enclos dans la ville, qu’on appelle la fosse des Araines. Les uns sont d’opinion que Jules Cesar fut destructeur dudit Amphiteatre : les autres disent qu’il fut destruit avec la ville, au temps de Chilperic neusiesme (sic) Roy de France [..]. Et me semble ceste opinion la plus vraye. Car nous voyons encores par externe apparence que des ruines d’iceluy les murs de la ville, qui avoient este brisez & rompuz, furent restaurez & reffaictz, & les pierres mises au piedz desditz murs, tout ainsi qu’elles furent tirees de la ruine dudict Amphiteatre, sans avoir esté aucunement retaillees. D’un costé on y voit infinie multitude de pieces de colomnes canellees à la Dorique : d’autre costé plusieurs pieces de corniches, & architraves de merveilleuse grosseur & grandeur, & pieces de frize fort bien taillees, & plusieurs autres chapiteaux faitz à la Corynthienne, à l’Ionique, & à la Dorique : avec une quantité infinie de pieces de pilastres imparfaictz, rompus & brizez, & pierres percees qui accompagnoient les ditz pilastres, posées par dehors au dessus du sommet de l’Amphiteatre. Esquelles pierres percees on plantoit grosses pieces de boys servans à tendre & attacher les toiles & tentes pour couvrir ledict Amphitheatre. […] En la maison de maistre Jehan Arnauld procureur general du Roy au [236] bailliage de Berry, qui me monstra en sa court ou il faisoit crotter en la muraille antique, un grand amas de pierres, la pluspart desquelles estoient bases & colomnes grosses & moyennes, chapiteaux Corinthiens & Ioniques & grande quantité de pierres de marbre gris & blanc. »