GALLIA ROMANA

Lawyer and lieutenant of water and forestry management in the county of Boulogne (15..?-16..?)

« A l’opposite de la Dunette, sur le hault du mont et fallize, est la tour d’Ordre, appelée par l’Angloix le vieil homme, tour d’admirable structure, de hauteur insigne, d’espaisseur mémorable, bastie de briques fort larges avec rangs de pierres bizes joinctes et liées de ciment, estant à huict angles et pans ; desquelz chacun contient vingt et huict piedz ou environ de front et face ; que les plus anciens du lieu récitent, avoir apprins de père en filz, avoir esté construicte par le commandement de Jules Cæsar. Ce qui n’est toutefois aucunement vraisemblable. D’aultant qu’il ne séjourna que 25 jours par deçà au port Itien pour son voiage, et au précédent i arresta fort peu de temps : n’aiant esté son séjour suffisant pour i avoir peu faire bastir si haulte et massive tour. Aussi il ne s’en list ung seul mot dans ses Commentaires : esquelz il n’ha passé soubz silence choses de moindre [4] remarque. Est plus croiable que ce seroit aultre des Cæsars et de ceux qui, associés à l’Empire, aians pour leur partage les Gaules et l’Angleterre, ont prins plaisir en ces quartiers. Si ce n‘est qu’on la vueille attribuer à C. Caligula, quatriesme empereur ; duquel Suétone faict mention en ces termes : Enfin faisant marcher son armée vers la coste de l’Océan, et aiant donné ordre à ses machines, traictz et instrumens de guerre, sans advertir aucun et sans que les siens peussent soupçonner son intention et entreprinse, tout-à-coup commanda qu’ilz eussent à recueillir et ramasser des cocquilles marines, et d’icelles emplir leurs heaumes, plix de robbes et vaisseaux ; les appellans despouilles deues au Capitole et au palais. Et en signe et remarque de la victoire et pour trophée, fit bastir et eslever une fort haulte tour, en laquelle seroient allumez et reluiroient toutes les nuictz des feux et fallotz, pour r’addresser la routte et conduitte des mariniers.
Estant certain que pour le iourd’hui encore ceste tour sert de phares, et que durant la nuict i ha feu pour dresser le voiage des nautonniers . Si ne se peult denier que ceste tour ne soit de mainte centaine d’années construicte comme desmontre assés Paul Æmile en la vie de Charlemaigne, usant de ces motz : Après la mort de Leger, comte de Harlebecq, son fils Enguerrand lui succéda au gouvernement de Flandres, où, soubz l’empereur Charlemaigne, l’an 809, il endura beaucoup des escumeurs de mer, et des brigans des bois : desquelz nonobstant il vuida et purgea tout le [5] païs, moiennant le secours que l’Empereur lui mena lui-mesmes lorsqu’il repara la vieille tour de Boulogne, en laquelle se met une lumière pour redresser les nautonniers qui s’esgarent en mer. Aultres escrivent que ce fust Loys le Debonnaire, son filz, qui se trouva à Boulongne en personne et fist redresser le phar de la haulte tour. Aucuns en voudroient faire autheur Constantius, empereur, père de Constantin-le-Grand, qui se contentant des Gaules et Angleterre pour son partage, i demoura : et son dit filz Constantin rembarra une grande trouppe de Germains et Danois qui s’estoient retirez es costes du Boulonnois : ou bien Julian l’Apostat qui séjourna long temps aus Gaules, et fust salué par sa gendarmerie empereur dans Paris. Sur la montaigne où est assise ladite tour d’Ordre, les Angloix, l’an 1545, bastirent une forme de ville, en laquelle ilz enfermèrent icelle tour »…