GALLIA ROMANA

DLF XVII^e siècle, pp. 341-342 ; Provost 1999-2, p. 736 ; Lemerle 2005, pp. 88-91

The 'Pont du Gard' was probable the most universally admired Gallo-Roman monument

« Le pont du Gard, qui est entre Beaucaire & Nismes, est incomparablement plus superbe & plus hardy que les pyramides & que les colosses, & que ceux qui l’ont consideré confessent que les Romains n’ont iamais laissé de si augustes marques de leur grandeur, soit pour la despense, soit pour les ouuriers : estant bien plus difficile de ioindre deux montagnes ensemble auec vn pont, & de faire couler des riuieres les vnes sur les autres, que de lier des pierres auec du ciment, & de faire vne image de bronze, qui n’a rien d’extraordinaire que sa grandeur & grosseur.
[p. 185] C’est donc ce pont, basty sur la petite riuiere du Gardon, qui est capable de former dans nos esprits vne iuste & veritable idée de la gloire des Conquerants du monde : ses trois estages esleuez l’vn sur l’autre valent plus que les amphitheatres : ses arcades & ses pilliers sont des pieces plus hardies que toutes les colomnes & que tous les arcs de triomphe des Empereurs, & particulierement de l’Empereur Antonin, qui le fit faire. Ce sont effectiuement trois ponts appuyez les vns sur les autres, dont le plus bas qui sert de passage en esté aux hommes & aux bestes, a six arcades, de quatre cens trente-huict pieds de long, & quatre-vingts & trois de haut. Le pont du milieu, où l’on passe en hyuer quand les eaux sont desbordées, & soustenu d’onze arceaux, & a sept cens quarante six pieds de longueur & vingt-vn en hauteur ; la largeur de chaque pillier est de treze : mais le temps qui consume tout, & qui se détruit luy-mesme auec ses ouurages, y a fait quelque ouuerture, qui rend le passage dangereux. Le troisiesme, qui est le [p.186] plus esleué, est de brique, composé de trente-cinq arches, qui seruoit autrefois d’vn aqueduct pour conduire vne fontaine d’vne montagne à l’autre, & porter l’eau dans la ville de Nismes, à quatre lieues de là, qui en manque vne partie de l’année pour ses moulins & autres vsages. Ceux qui ont mesuré tout l’ouurage l’ont trouué haut de quatre-vingts deux pieds. »