GALLIA ROMANA

Bonnard 1908, pp. 444-448 ; Corrocher/Pibloue/Hilaire 1989, p. 34 ; Lemerle 2005, pp. 67, 109

« L’adjencement est que trois grands puys entr’ouuers à desseing, en diuers lieux de leur structure, pour l’aiyde de la descharge, & reception de ces sources, seruent à toutes trois. I’ay oüy dire qu’vne seule pierre sert de fondement à tous lesdits puys separez, qui neantmoins ont rapport les vns aux autres : assez grands, bastiz industrieusement par angles, ou arestes tirées du fonds ; ie croy que leur longueur (comptée la distance qui est entre chacun) peut estre de quinze pieds, ou vn peu plus : Ils sont bien cimentez, posez dedans le grand espace du bain, fort proches de la muraille, du costé de la maison du Fauconnier, tirant vers le Soleil leué. Il y a trois sieges assez larges, couuerts de la mesme muraille du bain, qui seruent à reposer ceux qui se baignent. Il y aussi autour dudict bain cinq grands degrez pour y descendre : La figure en est presque carrée, & capable de tenir bien cent personnes ; il est diuisé en deux par vne muraille faicte à trauers, qui n’est pas esgallement tirée : Car telle separation semble auoir esté faicte en faueur des pauures, & miserables qu’on ne pouuoit souffrir qui se baignassent auecques les autres, à cause de la saleté & ordure dont ils estoient couuerts : De faict, le petit s’appelle encores de present le bain des pauures ; & par iceluy s’esgoutte le grand, quand on le veut nettoyer. Il est paué de grandes pierres de taille, au lieu que le grand n’est que parsemé de pierres de gré, par le milieu desquelles ressortent quelques petites sources de ces Eaux chaudes naturelles »…