GALLIA ROMANA

DLF XVII^e siècle, p. 262 ; Jenny 1985 ; Coulon/Holmgren/Provost 1992, pp. 64-66 ; Dumasy-Mathieu 1994 ; Lemerle 2005, pp. 77-78

« au fais & sommité de laquelle [montagne] est construict & edifié vn fort & ancien chasteau cloz & enuironné de hautes murailles hors d’eschelles, sept grosses tours & troys petites, l’vne desquelles, qui est la plus grosse de toutes, est appellée la tour d’Eracle : ayant son regard sus le païs de Berry, en laquelle est figurée & enleuée la statue & effigie d’vn Toreau fort antique alentour duquel est escript Veni et Vici, l’autre est prés ioignant icelle : en laquelle y a vn puys profond à merveille, appellé le puys du Donion.[…] Du costé regardant le païs de Guyenne y a trois autres grosses tours : dont l’vne est assise sus le festz du roc, appellée la tour du guet : les autres deux sont plus basses, construites d’vne mesme hauteur & grosseur que les autres : esquelles y a cisternes bien cymentees & de forte composition, où l’on faict reserue d’eaue. […] [263] Anciennement, & mesme au temps de Iules Cesar la ville d’Argenton estoit où à present sont certains grandz mas de vignes appellez le palays [toponyme de l’amphithéâtre], les murs sainctz [Mersans] & le virolz [toponyme du théâtre], distans de la ville d’Argenton (qui est a present) de deux traictz d’arc ou enuiron : & estoit de grande estendue & circuit, comme on peut voir encores pour le iourdhuy, par le pied & fondement d’icelle, & des grosses tours, triples muralles, & autres forteresses à present ruynées. Dans iceux mas on trouue encores belles & grandes caues & fondementz de maisons, & autres bastimens anciens faictz de si bonne matiere & composition qu’il est bien difficile à les demolir & arracher. On y voit encores les ruynes de plusieurs fontaines artificielles belles & somptueuses, d’ont les canalz & conduictz sont de marbre : mesmes y a des estuues faites d’alabastre, auec grandz pilliers faictz en forme de colomne, & plusieurs effigies & statues de lyons bien & excellemment taillez apres le naturel : dont aucuns tiennent entre leurs griffes, des testes de mouton. En vn autre mas de vigne, nommé le cloz de sainct Anastaise, pres & quasi ioignant le circuit des murs ruynez de l’ancienne ville, se sont trouuez puis deux ans en ça deux monumentz fort grandz & magnifiques : l’vn d’iceux d’homme & l’autre de femme, & n’est année que esditz mas de vignes & autres circonuoysins ne se trouuent quelques pieces & medalles d’or ou d’argent, & signamment de cuyure & autres metaux […]. En vne partie du circuit de ladite ville ancienne est à present edifiee & bastie la ville de sainct Marcel, petite ville : en laquelle y a vne fort belle eglise. En l’autre partie dudit circuit ioignant ladite riuiere de Creuze, est construite & bastie l’eglise parrochialle de la ville & faux bourgs d’Argenton qui est appellée sainct Estienne, distant d’vn traict d’arc de la dite ville. Auquel endroit on peut encores voir à present deux belles & fortes pilles de pierre de taille, & l’apparence des autres où souloient estre les pontz de ladite ville ancienne, à l’yssue desquelz, du costé du chasteau, [264] y a vn chemin taillé par grand labeur & artifice en vn roc si dur qu’on ne se peut assez esmerueiller de l’ouurage, & estoit lors ce chemin le passage pour aller de Paris en Gascongne. Toutes ces antiquitez font assez apparoir quelle estoit la grandeur & magnificence de ladite ville ancienne : en laquelle les Romains auoient anciennement lieutenans, preuostz ou gouuerneurs : entre lesquelz nous lisons par histoire, vn nommé Heracle, auoir esté prevost ou Gouuerneur au temps de l’Empereur Decius, souz lequel furent liurez au martyre Marcel ieune enfant, & Anastaise Romains, pour la confession du nom de Iesus Christ. »