GALLIA ROMANA

« Ressentent aussi leur antiquité les murailles de la première ville despuis ce chastellet iusques au Chasteau, lesquelles sont restees en quelques endroits malgré le temps et les desastres aduenus à la pauure ville faictes de grands quartiers de pierre de [14] quatre à cinq pieds de longueur & larges à l’aduenant, entassees l’une sur l’autre sans mortier, comme celles que nous voyons basties du temps des anciens Romains (à Saintes & Perigueux : & si s’est encores cette annee descouuert une marque de plus grand antiquité en ces murailles, qu’ayant esté ouuertes, on a trouué l’interieur d’icelles faict & massonné de pieces d’autres pierres qui auparauant auoyent serui a autres edifices, comme colomnes, frises et soubassements, qui monstre que iadis lesdites murailles furent faictes des ruynes de quelques Temples, ou autres superbes bastiments autres-fois basties au mesme lieu, Indice d’une tres-grande & non recordable ancienneté. »