GALLIA ROMANA

DLF XVII^e siècle, pp. 408-409 ; Deschamps-Juif 1963 ; Étienne 1962, pp. 191-195 ; Lemerle 2005, pp. 70, 104-105

« Le Palais Galienne fut jadis un bel amphiteatre a quatre cens pas de la ville de ce temps la, Il y avoit six murailles l’une autour de l’autre, faites de semblable matiere & ordonnance que les murailles de la vieille ville (desquelles nous parlerons cy dessouz) & de ces six celle de dehors est encore la plus haute, de trois grands pieds d’espesseur : & de la viennent les autres en s’abaissant peu a peu jusques à la derniere du dedans qui n’a pas plus de deux pieds d’espesseur. Entre lesquelles deux y i a environ nonante & six pieds. Il y a deux portaux, un de chaque bout, par où est la longueur de l’Amphiteatre. Laquelle longueur dedans la sixiesme muraille a trois cens septante pieds : la largeur de ceste longueur [702] deux cens trente, ainsi que les Amphitheatres se faisoient de forme d’œuf anciennement. Cet edifice icy tant bien fenestré a aussi prou donné à songer aux gens, & se sont finalement trouvez d’habiles hommes & deça & de la les Pyrenees qui nous en ont fait de beaux contes, que je serois bien marry d’avoir icy contez. J’escrirois plustost qu’il eust esté ainsi appellé du nom de Galienus que de quelque femme Galiena ou Galiana. Car Rome avoit un Emp. Nomme Gallienus l’an de Jesus Christ deux cens cinquante sept auquel temps les Romains estoient encore maistres de la Gaule: & Lieutenant de l’Empire en la Guienne estoit un Senateur Romain nommé Tetrique : lequel fut en son absence esleu Empereur par les gend’armes, qui ne pouvans plus supporter la vie disolue de Galienus, le contraignirent de prendre le manteau d’escarlate dans la ville de Bourdeaux, & se porter pour Empereur, ainsi qu’escrit Eutrope : je penserois di-je plustost que cest Amphiteatre eust esté basty souz l’Empire de Galienus, & qu’on luy eust de la baillé tel nom : Mais on l’appelle aussi Arenes, comme celuy de Poitiers, & de Nismes : & a tel nom en de vieux instrumens Latins de sainct Simeon qui est pres de la, lequel nom d’Arenes est venu de ce que les anciens pavoient de sable ou Arene les lieux où ils faisoient leurs joustes & tournois : comme nous en pavons auiourd’huy nos lices. »