GALLIA ROMANA

DLF XVI^e siècle, pp. 1193-1194 ; Étienne 1962, pp. 191-195 ; Lemerle 2005, pp. 66, 104-105

« Le Palais Galiene fut jadis ung bel amphithe[a]tre, a quatre cens pas de la ville, de ce temps là. Il y avoit six murailles, l’une au tour de l’autre, faites de semblable matiere et ordonnance, que les murailles de la vieille ville : desquelles celle de dehors est encores la plus haute, et de là viennent les autres en s’abbaissant peu a peu jusques a la derniere du dedans. Entre lesquelles deux y a en[B 2]viron de huitante six piés. Il y a deux portes, une de chaque bout, par ou est la longueur de l’amphitheatre, laquelle longueur par la place de dedans, a deus cens vingt quatre piés : la largeur prinse par le milieu de ladite longueur, cent quarente quatre, ainsi que les amphitheatres se faisoient de forme d’œuf, antienement. Cest edifice ici tant bien fenestré, a prou donné a songer aus gens : et s’est finalement trouvé un habile homme, qui en a fait ung beau compte que je serois bien marri d’avoir ici compté. J’escriroye plus tost, qu’il eust esté ainsi appellé du nom de Gallienus, que de quelque femme Galliena. Romme avoit ung empereur nommé Gallienus l’an de JESUS-CHRIST deus cens cinquante fept : au quel temps les Romains estoient encores maistres en la Gaule : et le lieutenant de l’empereur en la Guiene, estoit ung senateur Romain nommé TERIQVE. Lequel gouverneur de la Guiene fut en son absence esleu empereur par les gendarmes, qui ne pouvoient plus supporter la dissoluë vie de leur empereur Gallienus : et le contreindrent de prendre le manteau d’escarlate en la ville de Bourdeaus, et se porter pour empereur, ainsi qu’escrit Eutrope. Je penseroie, di-je, plustost, que cest amphitheatre eust esté basti soubs l’empire de [B 2v°] Gallien : et qu’on lui eust de là baillé tel nom. »