GALLIA ROMANA

Paris, Bibliothèque nationale de France, ms. Fr. 5447, ff. 64v°-65, 67-68

DLF XVI^e siècle, pp. 1060-1061 ; Burdy 2002 ; Lemerle 2005, pp. 58, 111 ; Le Mer/Chomer 2007, pp. 206-208

« Lesdictz ars [à Lyon et extra muros] sont appellees par le peuple rudde et barbare ars des sarazins pour cézarins et communement tout ancien ediffice il appelle ouvraige de sarazin par parolle corrumpue pour cezarin ou des cezars empereurs. Or ses dictz ars en latin sappellent Aqueductus c’estadire conduictz d’eaues amenee (sic) de loing aux villes pour la chose publicque et mesmement aux villes ediffiees en hault, ou s’appellent fontaines amenees de loing par conduictz tant soubz terre que dessus lesdictz ars et sont ainsi faictz pour nempescher le territoire affin de passer facillement de l’ung a laultre Lesdictz aqueductus sont faictz par grande geometrie car vous les voyez descendre des haultes montaignes et remonter par-dessus d’aultres bien haultes et sont cavees lesdictes montaignes artifficiellement, et cymentees partout, [65] et sont exellens et d’infinie despense considerant lorige de l’eau venant de si loing que l’on voit de cinq ou six lieues et sont beaulx a veoir et, de bel art de massonnerie et extime que sa este le plus somptueux et plus digne de mémoire ediffice quoncques fut aux gaulles aux quelles ne voyez point de semblables ruine Il ya encoures des ses aqueductus pres greizieu, quon appelle la tour raix et mesmement, le vulgaire quest adire la ou passoit l’eaue comment lon dict a [blanc] en latin aquis cest eaux. »