Transcription
« Les Romains pour gaignier la bonne grace du Peuple et se mettre en estime en tout ce pays illustrerent ceste ville de la construction dun cirque. Il est basti au pied de la montagnie (sic) en forme de theatre, que le vulgaire appelle le Circ. Le devant de ceste rare piece est honoré en perspective dune espece de Pont à deux arcades une dessus de lautre. Il a dix huict toises de hauteur & soixante quatre & un quart revenants a cent vint et six pieds de longueur.
On celebroit dans ce cirque, les jeux & les combats des gladiateurs qui se faisoient tantost dhomme a homme, et tantost de bestes sauvages entres elles mesmes, ou des esclaves contre les animaux les plus furieux comme les Ours, Taureaux, Lions, Pantheres, Onces [lynx] et Tygres. Les hommes y combattoient quelques fois, & le plus souvent à pieds & d’autres fois à cheval, comme on le peut conjecturer des lices et des stades qu’on voit au devant du cirque.
On voit par le dehors les sieges des spectateurs faicts en forme de degrés et en voutes basses tirant contre mont& vers le rocher. Ils estoient [275v°] distingués en lignies (sic) basses & superieures pour fayre la difference des plus notables d’avec le commun. Le siege des empereurs s’appeloit Podium, ou estoit l’orchestre, et a mesme rang les vestales estoient assises. Le second rang estoient ou les senateurs se tenoient & les chevaliers en mesme ordre qui sappelloit, Cavea.
On voit aussi plusieurs portes en ceste muraille faictes en forme darc qui ont esté fermées de fraie, lesquels terminoient le cirque du costé du Septentrion. Celle du millieu qui est la plus grande est la principalle. Cestoit l’entrée triomphale de ce lieu. Tout lordre toscan des autres arcs est si bien compassé qu’il n’y a rien de semblable en leurs pillastres, chapiteaux et corniches. Les hommes entroient par les unes, et les bestes par les autres : aditus et porticulæ erant in theatro e quibus feræ immittebantur in theatrum e emittebantur ad venationem.
Il y a des beaux corps de logis à chasque bout du cirque pour le logement du concierge et des officiers de ceste maison publique comme du laniste qui estoit le capitaine de l’[…] et de la famillie gladiatorre ; de lapictore [ ?] et du chirurgien qui soignoint les malades et pansoint les bleus ; pour enfermer les gladiateurs & pour enfermer les animaux. »
|
