Transcription
« Et quant aux Arenes les ayant veües autrefois d’environ douze pieds d’hauteur, & ayant fait fouiller dans la terre la naissance des arcs & des portes, elle [ma mémoire] à donné jugement & cognoissance de la forme qu’elles ont eu anciennement, laquelle j’ay [15]fait rapporter à celle qui est cy dessous representée. […] [29] L’Auteur de cet edifice est demeuré incognu à la postérité. La forme, l’etofe, & l’usage demonstrent, que son ancienneté n’est moindre, que celle des Amphitheatres ; puis que semblables exercices se faisoyent aux uns & aux autres. Mais les plus solemnels estoyent practiqués dans les Amphitheatres, le lieu estant plus celebre, plus grand, & plus capable de contenir à l’aise, & sans incommodité un grand peuple ; bien que la plupart des anciens auteurs, ayent le plus souvent indifferemment usé de leur noms, pour signifier l’un & l’autre.
a Le sablon & l’arene qu’on avoit lors accoustumé d’espandre emmy la cour, sur le pavé ou solage d’icelle, pour empecher que les combatans ne vinsent à s’endommager lors qu’ils cheoyent en terre ; adonné le nom d’Arene a cét edifice, & la rendu particulier à celuy cy ; bien qu’au paravant il ne fut proprement donné qu’au vuide ou place des Amphitheatres, à cause de l’arene qui y estoit parsemée ; ou bien nos majeurs ont voulu appeler celuy cy Arene, plus proprement que ceux de Nismes en Languedoc, & ceux d’Arles en Provence, ne nomment les beaux et somptueux Amphitheatres, qu’ils ont encor fort entiers dans le pourpris de leurs murs ; & notamment celuy de Nismes du nom d’Arenes, bien qu’ils soyent des vrais & parfaits Amphitheatres, à cause de leur forme ronde, & des sieges qu’on y voit tout autour servans jadis aux spectateurs.
b La forme de celuy cy, qui est en Ovale, & le defaut des sieges en dedans, luy a donné le nom particulier d’Arenes, ou bien là on (sic) ainsi appellé pour le distinguer de nostre grand & magnifique Cirque. Car bien qu’on appelloit improprement les Theatres, Cirques, & Amphitheatres, Arenes, à cause du sablon qu’on y semoit, & des spectacles auxquels ces lieux publics estoyent employés ; la diversité de leurs formes, & la construction de leurs bastimens les à differentiés de nom. Un Cirque ou Theatre est fait en forme demy ronde, comme le nostre ; un Amphitheatre en forme ronde, de deux Theatres joints ensemble, comme ceux d’Arles & de Nismes ; les Arenes estans plus simplement edifiées & avec moins de somptuosité, le plus souvent en ovale, & sans sieges pour les spectateurs, ains seulement avec des portes en-dehors comme celuy cy, sont plus proprement nommes de ce nom : c bien que aucuns Amphitheatres ayent esté faits aussi en forme d’ovale ou de bar-long, mais rarement.
d Le dedans & la capacité de ce lieu, estoit donc destiné au combat des hommes, les uns contre les autres ; ou bien des hommes contre les bestes ; ou bien des bestes farouches de diverses, ou semblables especes les unes contre les autres. e La s’exerçoyent les gladiateurs & escrimeurs à outrance ; tantost pour faire preuve de leur valeur & dexterité, qui n’avoit pour but que la gloire, & l’honneur d’avoir bien combatu, tantost pour la deffence de leur vie, ne se proposans qu’une fin luctueuse, & sanglante. La aussi descendoyent les captifs & prisonniers de guerre, pour sentre-tuer & se destruire les uns les autres. f Ceux qui estoyent destinés au combat se nommoyent commis ; & ceste commission estoit faite en escrivant les noms des combatans, comme dans des billets, lesquels on jetoit apres dans une urne destinée à cella, pour monstrer qu’ils estoyent voués à la mort ; & de la les Preteurs les ayant retirés, ceux qui s’y rencontroyent escrits estoyent obligés de descendre dans ces lieux là. g Les combats s’y faisoyent ou à coups de poing, ou â coups de baston, ou à coups d’espée, ou bien avec la lance & le javelot, ou bien avec autres armes qui lors estoyent en usage. h La aussi les luteurs faisoyent preuve de la force de leurs corps, & les sauteurs de leur adresse & agilité à s’eslancer.
[
30] Tous ces combats & spectacles se faisoyent devant tout le peuple ; ou pour luy donner du plaisir & du contentement ; ou bien affin que leurs jeunes hommes, qui en estoyent aussi spectateurs s’accoustumassent au meurtre, au sang, au carnage, & à voir d’un œuil sec sans horreur, les corps humains entre-ouverts de playes, se tantoüiller dans leur sang meslé de poussiere. Les saturnalles se passoyent ordinairement en ces exercices, qui leur estoyent tres agreables & qui feurent en peu de temps distribués par toutes les Provinces de l’Empire Romain.
Ces Arenes sont assizes, hors les murailles de la vielle & nouvelle ville, peu distantes de la vielle, & d’environ quatre cents pas de la nouvelle, du costé du couchant, & de la porte S. Martin.
Je les ay veües autrefois, ayans leurs murailles presque tout autour, de la hauteur de plus de douze pieds en aucuns endroits, en d’autres moins, avec les formes ou naissance des portes en nombre de vingt quatre. Elles ont esté depuis peu abatues & quasi razées à fleur de terre. Les fondements paroissent tout autour, avec les ouvertures des portes, & la forme de l’ovale relevé en dehors par la terre laquelle vray-semblablement à esté tirée du dedans ; pour rendre le lieu plus commode, & mieux exposé à la veüe des spectateurs, qui regardoyent d’en-haut tout autour.
L’estofe du bastiment estoit composee de pierre, & d’un ciment tres dur ; ayant en face dedans & dehors des petites pierres grises, taillées en carré d’environ demy pied chacune, de construction pareille à celles des Aqueducts, des Bains antiqs, & des vielles murailles de la ville. »
Notes en marginalia
p. 29
a Ejus area dicebatur cavea, et arena, quod arena spargeretur ut certantes sine offensione caderent. Suet.
b Neque omnino dissimilis Amphitheatri forma erat, ut quæ ovum appelletur à Tito Calphur. Stic. Eglog. 7. ut annot. Turneb. Lib. 7. advers. Cap. 6.
c Amphitheatra circulari integra forma construebantur aut ovali et oblonga. Suet. Cassiodor. Var. lib. 5. epist. 42.
d Lipsius Saturnal. Lib. 1 et 2. fusè de his gladiatoribus discerit (sic). In his locis gladiatorii ludi et conclusarum ferarum venationes exibebantur. Suet.
e Huc spectat et gladiatura, cum gladiatores variis modis dimicabant interim pro gloria ; interim pro vita idque spectante populo Virg. Lib. 5. ænid. Homer. Penult. Iliad.
f In hisce ludis sine (sic) Amphitheatralibus, sive circensibus certaturi, dicebantur committi, fiebatque hæc commissio nominibus certantium in urnam injectis, atque inde à prætore eductis. Donat. Ad lib. 5 Ænid. Virg. Et Symm. Li. 10. epist. 22.
g Pugnabantur commissi cum pugnis cæstibus, gladiis, fustibus, hastis, pilis, similibusque armis. Virg. Lib. 5. Ænid. Homer. Pen. Iliad.
h Huc quoque refertur lucta, saltatio in æquo campo. Hieron. Mercurial. Medic. Patav. In 2. et 3. lib. Art. Gymnastic. »
|
