GALLIA ROMANA

Oehme 1965, p. 9-17 ; Frézouls 1988, p. 137-157 ; Joan 2003, p. 175-200 ; Lemerle 2005, p. 34, 121-123

« Et quant aux murs dont Cesar faict mention, & qu’il afferme qu’ils aboutissoyent des deux costez, à la riviere du Doux, ils se voyent encores à present, & separent la montaigne S. Estienne de celle qui est dicte de la Croze, le commancement desquels est depuis la porte taillee, qui est une roche cavee & creusee avec instrumens de fer pour servir de porte, jusques à la porte de Maupas. Il s’en trouve qui afferment que la tour S. Quentin qui est maison ancienne d’un noble bourgeoys de Besanson, avoit autres foys este la porte de ceste ville. Les autres dient le mesme de la porte Noiae (sic), ce qu’ils conjecturent par les marques d’antiquité qui y sont. Et combien que la Monarchie de Besanson n’ait point telle auctorite & puissance qu’eut jadis celle des Romains toutes foys si approche elle à la fame & gloire d’icelle, par la magnificence des edifices publiques, car on y void des places anciennes telle qu’il y a à Rome, comme le Pantheon, le Champ de Mars de Diane, de Minerve, le champ de la Lune, les colomnes, toutes lesquelles choses se nomment vulgairement en latin, & si a encores en ceste ville plusieurs autres marques d’ancienneté. » (trad. S.l.s.n.s.d.)