GALLIA ROMANA

DLF XVII^e siècle, p. 408-409 ; Deschamps-Juif 1963 ; Gaillard 1836, p. 120-174 ; Lemerle 2005, p. 70, 102-103

« J’adjousteray pour marque de grande Antiquité ce que dit encore l’Annaliste, que La commune renommee de Poictiers faict bruict d’un Palais lequel y fut autrefois edifié, appellé le Palais Galienne, et des Arennes, dont on peut conjecturer par les vestiges, qui encore apparoissent que ce fut un Palais somptueux, et de grande structure : mais je n’ay trouvé absolument qui l’a fait faire : toutesfois on pourroit dire qu’il fut fait du temps que Galienus estoit Empereur de Rome, qui fut l’an de salut deux cens cinquante sept, et aussi le Palais Galienne de Bourdeaux, Car les somptueux edifices qu’on faisoit és villes, regions, et Provinces estant souz l’Empire Romain, prenoient communement leur nom des Empereurs qui lors estoient. Et le dit Galienus tint son Empire Aquitaine, comme il appert par l’Histoire et Legende de Monsieur sainct Cler qui fut martirisé souz sondit Empire. Et quant au lieu des Arenes, qui est joignant ledit palais, c’estoit le lieu pour faire ioustes et tournois. Et pour l’entendre est à [569] presupposer que les Romains eurent les exercices et discipline militaire, comme recite Blondus, et avoient places sablonneuses, qu’ils appeloient Arenes, et pres d’icelles cavernes et fosses voutées où ils incarceroient, Lyons, Liepars, Ours, et autres bestes cruelles, contre lesquelles les gens qu’on vouloit envoyer en guerre qu’ils appeloient gladiateurs se combattoient sur l’areine, c’est à dire sur le sable, tant pour le passetemps des Princes que pour les rendre plus hardis en guerre, dont Suetone parle en la vie de l’Empereur Auguste : Et voit-on encore és Arenes dudit Poictiers les vestiges desdites cavernes et prisons souz terre. Et au regard des grands arceaux qu’on void hors la ville de Poictiers, respondant à ce Palais, c’estoient conduits et canals, pour faire distiller et venir l’eau de quelque fontaine en iceluy Palais. »