GALLIA ROMANA

« La commune renommée de Poictiers faict bruict d’ung Palais lequel y fut autresfois edifié, appelé le Palais Galienne et des Arennes, dont on peut conjecturer par les vestiges qui encores apparoissent, que ce fut ung Palais sumptueulx, et de grand’structure : mais je n’ay trouvé absolument qui l’a faict faire. Toutesfois on pourroit dire qu’il fut faict du temps que Galienus estoyt Empereur de Rome, qui fut l’an de nostre salut deux cents cinquante sept, et aussi le Palais Galienne de Bourdeaulx.[…] [7v°] Et quant au lieu des Arennes, qui est joignant ledict palais, c’estoit le lieu pour faire jouxtes et tournois. Et pour l’entendre, est a presupposer, que les Romains eurent les exercices de discipline militaire, comme récite Blondus, et avoyent places sablonneuses, qu’ils appeloyent Arennes, et pres d’icelles cavernes et fosses voultées ou ils incarceroyent Lyons, Liepars, Hours, et autres bestes cruelles, contre lesquelles les gens qu’on vouloit envoyer en guerre, qu’ils appeloyent Gladiateurs, se combatoient sur l’Arenne : c’est a dire sur le sable, tant pour le passetemps des Princes, que pour les rendre plus hardis en guerre […]. Et veoyt on encore es Arennes dudict Poictiers, les vestiges desdictes cavernes et prisons soubs terre. Et au regard des grands arceaux qu’on veoit hors de la ville de Poictiers, respondans a ce Palais, c’estoyent conduicts et canalles, pour faire distiller et venir l’eaue de quelque fontaine en iceluy Palais. »