GALLIA ROMANA

« A deux petites lieues de la Ville montant d’icelle du costé du Midy vers le Pont-a-Mousson se void ce grand Mole de bastiment, composé d’une longue suitte d’arcades hautes & superbes, qu’une main artiste à si bien cimenté qu’elles ont en quelques sorte resisté iusques à présent à l’iniure du temps, & sont encore en l’estat que represente le portraict cy ioint soubz le nom d’Arches de Iouy. Et si le courant du fleuve de Moselle, & l’effort des glaces n’eussent prevalu sur l’aage, les deux extremitez que le canal separe, & qui sont sur pied à l’un & l’autre de ses bords, s’entretiendroient encores par l’existence du milieu. C’estoient Aqueducts [a4] ambitieux qu’utils, qui servoient à conduire ou nous dirons tantost les eauês claires & delicieuses que les sources qui eschappent en tres-grande abondance dans le Bourg de Gorze, à trois lieues de la Ville, fournissoient largement, & toutes lesquelles recueillies en un Receptacle avoient leurs cours par conduits soubs terre iusques au plus haut des Aqueducts. Ces canaux, ou conduicts enfouis, estoient de belles voultes faites toutes de petits carreaux de pierre de mesme forme, enduits de Cimént dont la force resiste encores à present à la pointe acerée du marteau, & de telle capacité qu’un homme pour peu qu’il se courbe y peut facilement passer. La quantité de ces eaues estoit accreue par celles que la belle fontaine d’Euzraille y contribuoit, & toutes ensemble se venoient rendre au lieu ou se void ceste ruine que l’on dit la Fosse-au-serpent, à mille pas au plus des murailles de la Ville. »