Transcription
« en faisant les fondemans d’icelle maison, l’on trouva yceulx viez mur, qui ce acommensoient depuis la ripvier de Mezelle, en montant amont devers le guernier de la ville, en tirant à porte Meselle, droit en ce lieu Dessus le Mur, et en dessandant Salnerie [159] tout permi Porcellis et Wyézineuf, droit à l’esglise de Saint Mertin et à la chappelle du Prey. Et ainssy ce pourtoit la vielle cité.
Vielle antiquaille trouvée és vielle muraille de la ville. – Et, affin que chacun saiche et cognoisse comment ycelle noble cité fut premièrement faictes et de nobles gens construicte et fondée, comme je l’ay mis à l’acommencement de ce présant livre, là où j’ez perlés de la fondacion d’icelle, bien ce trouva en sairchant les fondement des dite quaitre maison ; car alors fut sairchiez cy perfon que l’on trouva le fon ; et encor, en aulcuns lieu, fut cayvé plus baix que yceulx fondement, par quoy fut trouvés, comme j’ay dit devent, la grant magnificence de celle édification et premier fondation. Car dessoubs yceulx fondement furent trouvée de grosse pier de tailles platte et cairée, esquelles y avoit figure et ymaige d’hommes et de femmez eslevée et entaillée ; et estoient leur corsaige et fasson, avec leur abis, de diverse sorte et maniers ; et pourtoient par figure lez plusieurs d’ycelle ymaige aulcune chose en leurs mains, de diverse forme et semblance, et, avec ce, tout autour d’ycelle ymaige estoient plusieurs ancienne lettre rommaine escriptes, lesquelles nul ne povoit lire pour leur anciennetés, et n’y avoit causy homme qui sceût entandre que ycelle lettre voulloient dire ne signifier. Et estoient ycelle grosse pierre carrée mise et esseutte l’une après l’aultrez tout du plat, sans mortier, tout du loing par dessoubz yceulx fondemans, en manier de brossement. Et estoient touttes les devant dicte ymaige ainssy figurée és pier, comme dit est, tournée sen que dessus dessoubz, c’est assavoir la fasse et le visaige contre la terre ; et puis estoient les mur fondés dessus. Mais d’icelle ymaige en furent la plus part prinse et levée, et mise et amprée et enmurée és mur des dite maison par devent, comme encor ajourd’hui ce moustre. Et fut alors veu que par dessoubz les aultre maison, tout ainssy que ce contenoit la dite vielle muraille et cloéson de la vielle cité et tout du loing, sont et repouse perreille ymaige et figure de diverse sorte ; et, qui saircheroit, l’on lez trouvenroit, comme il se moustre en Anglemur, là où plusieurs ont estez trouvée, qui sont ampée et essutte en ce lieu en la muraille de la ville. […] [461] Item, aussy en celle année, à la fin du moix d’apvril, l’on acomensait à wuyder les foussés du billouairt de porte Champenoise. Et, ainssy que l’on vint à achaver ung peu parfont, l’on vint à trouver plusieurs grosse et espesse murailles, merveilleusement bien faicte, à la mode ancienne, et touttes de pier carrée et de bricque, comme les airche de Joiey, ou comme la court d’Onne à Mets : c’est assavoir que, parmi les dites pierres, y avoit belle sinture des dite bricque ; et estoit la chose la mieulx faicte du monde. Et creoit on que cest ouvraige estoit fait de moult loing temps devent l’incarnacion Notre seigneur : car il se moustroit que là y eust aultre fois heu aulcuns pallas ou châtiaulx, avec grant woulte. »
|
