GALLIA ROMANA

DLF XVI^e siècle, pp. 300-302, 168 ; Duval 1961, pp. 141-142 ; Buisson 1998, pp. 141-162 ; Lemerle 2005, p. 112

« Le susdict Julian, citoyen de Paris, ou aussi il fut proclamé Empereur, feit bastir, outre le Chastelet, l’hostel de Clugny, pres des Mathurins qui estoit en un [lieu] champestre & luy servoit de lieu de plaisance, & sejour, lors qu’il vouloit prendre relasche de ses travaux & affaires d’importance, & ce lieu estoit anciennement nommé le Palais des termes, & de vray, il y a leans une grande salle, sur la platte forme, de laquelle y a des jardins avec arbres qui porte creance de longue antiquité : car l’edifice est de matiere forte & dure, comme un roch, & le nom de Palais des termes luy est demouré jusques aujourd’huy, pource que l’on apportoit en ce lieu les deniers des termes des tributs deuz à [7v°] l’Empire Romain aucuns interpretent Palais des termes, pour les baings, lesquels y avoient esté faits par l’Empereur Julian l’Apostat, & dient que les eaux d’iceluy venoient de devers Gentilly : Cette raison est confirmee par les lettres de la fondation du college de Sorbonne, esquelles (quant à l’assiette du lieu) sont expressement contenus ces mots, Ad locum Thermarum Cæsaris. Quoy qu’il en soit, l’an mil cinq cens quarante quatre qu’on fit les ramparts & bastions à Paris, pour resister à la venue de l’Empereur Charles cinquiesme on trouva du costé de la porte S. Jaques des canaux de pierre de taille & conduicts de[s] eaux, continuez depuis le village de Arcueil, ainsi nommé à cause des arcs bastis de brique, qu’on voit encores de present, ou de ce mot Latin composé Aqueductus, jusques dedans Paris. Lesquels conduicts des eaux auroient peu servir ausdicts baings : & de present seroient necessaires à restablir, pour arrouser la haute partie de l’université de Paris, qui en a bon mestier, si messieurs les gouverneurs sy vouloient employer. »