Transcription
« Aupres l’Eglise de S. Pierre […] il y a un beau edifice en memoire de certaine bataille & destruccion faite en ce lieu, ensemble il y a un Arc triomphant, dans iceluy on dit que a un homme de la ville, luy apparut une fantosme ou homme enchante lequel lui pria de le suyvre disant qu’il lui monstreroit un grand thresor : mais l’homme ne le voulut croire, car il eut peur, & eut plus grand hatte de s’enfuyr que non pas de le suyvre [...].
[71] Encore d’avantage il y a autre edifice
Une porte bien grande faicte par artifice
Vulgairement nommee, le portail Sarrazin
Ou le Arc triomphant, car je l’appelle ainsin (sic)
Avec gros pilliers qui servent d’ornement
Les uns mis en derriere, les autres au devant
Et entre les pilliers sont pourtraits personnages
De diverses façons on voit plusieurs ouvrages
Au piedestra (sic), ou sont les coulomnes assises
Les targes et rondages en pourtraits y sons mises
Servant de armoiries, ou bien trouphee d’armes
Glorifiant l’honneur de ses vaillans gendarmes.
Et du haut par dedans la voute de la porte
Sont portraits fleurs et roses de diferentes sortes
Chose tres remarquable, ouvrages si parfaict
Que je ne sçaurois plus encherir sa beauté.
Par dehors est pourtrait Sextre en un chaire
Les armes sous ses pieds rompues et brisees
Et trois lettres gravees en la pierre massive
[72] V.V.V. signifiant vive vive autresfois vive
Cest edifice est pourtrait de la victoire
Afin que a l’avenir au peuple soit notoire.
Houeydes ou passe l’eau jusque a la marteliere
par dessous de la terre, plus d’une lieu entiere
Bastimens merveilleux espouventables au monde
D’ouyir bruire les eaux dans l’obscuritê fonde.
Les somptueux edifices de la citè de Rome
Les theatres ou arenes d’Arles Nisme, Verone
Feront leur compagnie aux susnommez icy
La raison puis ils sont anthiquitez aussi
Brief tout ce que en ce lieu on y verra poutraict
Langue, papier ny plume ne sçauroyent declarer
Mais comme ceux-cy sons edifices de pierre
Je les veux couronner d’un vert rameau de l’hierre. »
|
