Transcription
« je veux bien en premier lieu traiter de l’ecrit antique et notable qui est au magnifique mausolée et arc triomphal de la ville de st Remy près d’arles, qui est, jose bien dire, le plus excellant qui soit deça les monts pour la memoire des Romains, auquel se voient écrites ces paroles en grands caracteres :
SEX. L. M. IVLIII (sic). C. F. PARENTIBVS IV. S.
[…] [94] ce pourquoy je serois d’opinion, sous correction de meilleur avis, que le susdit mausolee et arc triomphal de st Remi y fut faict jadis en l’honneur de Caius Marius, consul Romain tant estimé pour la merveilleuse victoire qu’il eut contre les Cimbres et Teutons, qui estoient allemands et Gaulois, en nombre de trois ou quatre cent mille, desquels il triompha en grand magnificence et fit encores faire à Rome un temple d’honneur et de vertu pour y mettre les dépouilles et enseignes qu’il avoit gagne sur les dits Cimbres ; […] [95] L’on pourroit penser que la premiere deffaicte d’iceux fut possible, ez environs de Pourriere, car encores l’on dit icy communemant le triomphe de Pourrieres ; et par ce qu’en ce lieu là ne se treuve aucun trophée pour mémoire de cette victoire tant signalée, ou seroient quelques fragments de grosses pierres qu’il y a, je croirois aisemant que ces barbares Teutons, Cimbriens, qui tenoient encores grande etandüe de païs, en fuyant furent poursuivis jusques à ce lieu de st Remi, où ils furent totalement exterminés ; car l’histoire dit que ce fut joignant la montagne, et près d’une riviere nommée de l’arc qui est asses près dudit village ; dont nous pouvons croire que les Romains, tant en mémoire de ces deux victoires que pour raison de ceux qui moururent vaillammant en la premiere deffaicte, lorsqu’ils furent vaincus par deça près le Rhone, comme j’ay dit, firent dresser ce beau mausolée accompagné de l’arc triomphal qu’on voit icy. »
|
